Abahinga batatu ba ONU ntibarekuriwe kugaruka mu Burundi

Abahinga batatu bigenga b’ishirahamwe mpuzamakungu ONU baheruka mu rugendo mu Burundi, akaba aribo basohoye icegeranyo kivuga ingene agateka ka zina muntu kifashe, bafatiwe ingingo ko batakirekuriwe guhonyoza ikirenge ku butaka bw’Uburundi.

Abo bahinga batakirekuriwe kuza mu Burundi (Persona non grata) ni Sahli Fadel Maya, Christof Heyns, hamwe na Pablo de Grief, akaba aribo bateguye icegeranyo c’agateka ka zina muntu mu Burundi. Reta y’Uburundi yagirije abo bahinga ko batumvirije inzego zitandukanye za Reta, kandi ko n’ivyagirijwe Reta y’Uburundi bidafise ishingiro. Uburundi bwagiriza abo bahinga kandi ko bakoreye kuvyashikirijwe n’ishirahamwe ry’ubumwe bwa Buraya.

Abahinga ba Onu bigenga (uva i bubamfu uja i buryo) Pablo de Greiff, Christof Heyns na Maya Sahli-Fadel bariko barashikiriza icegeranyo ca nyuma i Geneve itariki 27 z’ukwezi kw’icenda mu 2016

Mu kiganiro aheruka guha abamenyeshamakuru, Koen Vervaeke, umuyobozi mukuru ajejwe Afrika mu gisata c’ibikorwa vy’ishirahamwe ry’ubumwe bwa Buraya, yasiguye ko abo bahinga bahuye n’inzego za Reta mu rugendo bagize mu Burundi, kandi ko bitari gushoboka ko ubumwe bwa Buraya aribwo butanga intumbero y’ivyoshikirizwa muri ico cegeranyo. Nk’uko vyashikirijwe na Koen Vervaeke, muri abo bahinga batatu ba ONU, babiri ni abanyafirika, umwe nawe akaba ari umunyamerika.

Icegeranyo c’abahinga b’ishirahamwe mpuzamakungu ONU ku matohoza ajanye n’ihohoterwa rya kiremwa muntu mu Burundi kuva mu kwezi kwa Ndamukiza umwaka w’2015 kivuga ko amabi yakozwe yerekana ko ihonyabwoko rishobora kuba mu Burundi.

Ico cegeranyo kivuga ko Uburundi bushobora n’ugukurwa mu nama y’ishirahamwe mpuzamakungu ONU ijejwe agateka ka zina muntu, abo bahinga bakoze ico cegeranyo bagasaba ko ubutungane mpuzamakungu bwofata mu minwe ico kibazo c’Uburundi, abagirizwa amabi yakozwe bashengezwe.

Abo bahinga ba ONU bavuga ko amabi yakozwe mu Burundi muri ico kiringo yagirizwa cane cane Reta y’Uburundi, kuko yakozwe n’abakozi bayo, Reta ikagirizwa kandi ko ataco yakoze kugira ihane ivyo vyaha. Nk’uko bishikirizwa n’abo bahinga, bisunze kahise k’Uburundi, ihonyabwoko rirashobora kuba.Inama ya ONU ijejwe agateka ka zina muntu iheruka kwemeza ingingo ishiraho umurwi w’amatohoza ku Burundi.

Uwo murwi ufise ikiringo c’umwaka umwe kugira uzobe washize ahabona icegeranyo c’ivyo washitseko, mu kwerekana abakora ubugizi bwa nabi mu Burundi, hamwe n’ugushikiriza ivyokorwa kugira abazoba bagirijwe ubwo bugizi bwa nabi babibazwe.