Abakuru b’ibihugu babiri ba EAC nibo bitavye inama igira iya 18 ibahuza

Muri iyo nama, umufasha w’umuhuza mu matati y’abarundi yashikirije icegeranyo c’ivyo amaze gushikako, yongera atanga ivyiyumviro ku vyokorwa.

Muri iyo nama, bigiye hamwe kandi ibijanye n’imigenderanire mu vy’ubutunzi hagati y’ivyo bihugu, n’ishirahamwe ry’ubumwe bwa Buraya.

Ivyavuye muri iyo nama turabigarukako mu makuru yacu yo hanyuma.

Tubamenyeshe ariko ibihugu vy’Uburundi n’Urwanda vyiyamirije icipfuzo c’uko ibihugu vyose bihurikiye muri uwo muryango vyoza biratanga intererano zingana mu gushigikira ibikorwa vy’uwo muryango.

Ivyo bihugu vyasiguye ko bifise ubutunzi bwavyo buciriritse bigereranije na Tanzania, Kenya hamwe na Uganda.

Iyo nama y’abakuru b’ibihugu yitabiriwe n’umukuru w’igihugu wa Uganda Kaguta Yoweri Museveni, uwa Tanzania John Pombe Magufuli, icegera ca mbere c’umukuru w’igihugu c’Uburundi Gaston SINDIMWO hamwe n’icegera c’umukuru w’igihugu wa Kenya William Ruto.