Abana n’abakuze basega mu mabarabara bahawe ikiringo ntarengwa

Ubushikiranganji bw’intwaro yo hagati mu gihugu busaba abavyeyi bafise abana birirwa bariyerereza mu mabarabara, abakuze birirwa barasegerereza, hamwe n’abasegesha abagendana ubumuga mu gisagara ca Bujumbura canke ku yindi mirwa mikuru y’intara ko boheba iyo ngeso, bijukire gukora iyindi mirimo yobateza imbere.

Mw’itangazo ubwo bushikiranganji bwasohoye kuri uwu wa kabiri, ryateweko umukono na Pascal BARANDAGIYE, umushikiranganji w’intwaro yo hagati mu gihugu, batanze ikiringo ntarengwa co gushika kuri uwu wa kane igenekerezo rya 19 Ndamukiza. Inyuma y’iryo genekerezo, ubushikiranganji bw’intwaro yo hagati mu gihugu buvuga ko ingingo zikomeye zizofatwa.

Abarongoye intara, igisagara ca Bujumbura, amakomine, imitumba ya rusansumahamwe n’amakaritiye basabwe kwitegura bihagije kugira bazokwakire abana hamwe n’abakuze basubijwe mu mihingo itandukanye baje bavamwo.