Accueil > Amakuru > u Burundi > Abarundi bahungiye muri Tanzaniya basabwe ko botahuka
Abarundi bahungiye muri Tanzaniya basabwe ko botahuka
jeudi 20 Mukakaro 2017, par
Mw’ijambo yashikirije i Ngara mu gihugu ca Tanzaniya, Petero NKURUNZIZA yamenyesheje ko mu Burundi hari amahoro, ahamagarira abarundi bari mu makambi y’impunzi gusubira mu gihugu cabo kugira baterere agacumu k’ubumwe mu kwubaka igihugu c’Uburundi.
- Umukuru w’igihugu Petero NKURUNZIZA
Umushikiranganji w’intwaro yo hagati mu gihugu ca Tanzaniya Mchemba MWIGULU yamenyesheje ko Tanzaniya yakiye impunzi z’abarundi kuva kera kandi ko mu myaka ya 2006 na 2007 abarundi barenga ibihumbi 160 baronkejwe ubwenegihugu bwa Tanzaniya.
Mchemba MWILURU yavuze ko kuva mu mwaka wa 2015 Tanzaniya yakiye impunzi z’abarundi, abakiri muri ico gihugu bakaba bagera ku bihumbi 247, kuko hari abagera ku bihumbi 150 bamaze gutahuka, akavuga ko hari n’abandi ibihumbi bitanu bamaze kwiyandikisha kugira batahukanwe.
Mwomenya ko urwo rugendo ari urwa mbere umukuru w’igihugu Petero NKURUNZIZA akoze hanze y’igihugu kuva mu mwaka wa 2015 aho haba igeragezwa ryo gutembagaza ubutegetsi bwiwe mu gihe yari mu gihugu ca Tanzaniya nyene.
Vianney BIKORIMANA
