Abashingamateka b’Uburundi baremeza canke bahakane integuro y’itegeko ry’ukuva muri CPI

Inama nshingamateka iriga kuri uwu wa gatatu itegeko ryarungitswe na Reta y’Uburundi, risaba ko igihugu c’Uburundi cokwikura muri sentare mpuzamakungu mpanavyaha.

Ico kiganiro kidasanzwe kibera mu nama nshingamateka y’Uburundi gitangura igihe c’isaha zitatu n’iminota mirongo itatu. Turagaruka mu makuru yacu yo hanyuma ku vyashikirijwe n’abashingamateka.

Abashingamateka ijana n’umwe nibo bitavye ivyo bikorwa, nayo umushikiranganji w’ubutungane, Laurentine KANYANA akaba ariwe yagiye gusigura igituma Uburundi bwafashe ingingo y’ukwikura muri sentare mpuzamakungu mpanavyaha.

Mu nama nshikiranganji yabaye kuri uwu wa kane igenekerezo rya 6 Gitugutu 2016, Reta y’Uburundi yemeje ingingo yo kwikura mu masezerano yashizeho sentare mpuzamakungu mpanavyaha, CPI.

Abashingamateka b’Uburundi bakaba basabwe nabo kwemeza canke kwanka iyo ngingo yafashwe na Reta.

Igihugu c’Uburundi cateye umukono kuri ayo masezerano y’ukuja muri sentare mpuzamakungu mpanavyaha kw’igenekerezo rya 30 Myandagaro 2003.