Burundi : Abashaka kwitura ubutungane ntibabushikira bose

Mu ntumbero yo gufasha kugira abantu bose baronke uburenganzira bukwiye ku butungane, ishirahamwe rijejwe gukurikirana ibikorwa vya Reta (OAG) rifadikanije n’ishirahamwe ry’abacamanza b’abakatorika mu Burundi (AJCB ), ryatunganije inama kuri uwu wa kabiri igenekereezo rya 30 Rusama 2017, yo kurabira hamwe intambanyi zituma ubutungane budashikira bose hamwe no guterera icokorwa kugira ubwo butungane bushikire bose.

Fabiyano Segatwa yashikirikije icigwa yamenyeshekeje ko intambanyi zituma abantu bose batitura ubutungane zifatiye ku bukene bw’igihugu, ubukene mu banyagighugu hamwe n’ukutamenya amategeko, gutyo bigatuma abantu badashobora kwitura ubutungane kandi bwari uburenganzira bw’umuntu wese, yaba muto canke mukuru.

Umushingwamanza Fabiyano SEGATWA

Kugira abantu bose bashobore kuronka akaryo ko kwitura ubutungane, Fabiyano Segatwa yasavye ko icokorwa ubwa mbere ari uko amategeko atawoja hejuru y’amategeko.

Segatwa yagize ati : "Habaye ubwigenge bw’abacamanza vyoha icizere abantu, gutyo bakahurumbira kwitura ubutungane babufisemwo icizere, kuko nta mucamanza yaciye urubanza rwiza mu myuma arahanwa, ariko uwuruciye nabi ikibanza ciwe kibarizwa mw’ibohero".

Kubw’umushingwamanza Segatwa, nta mucamanza yovuga ko atagira ubwigenge, kandi abuhabwa n’ibwirizwa shingiro ry’Uburundi.

Segatwa yasavye uwaserukiye inama nshingamateka y’Uburundi ko urwo rwego rwofasha amategeko akaja mu ndimi abantu bose bumva.