CNC: Uwukeneye abamenyeshamakuru niwe amenya igitigiri atumira

Inyuma yaho abamenyeshamakuru bamwe bo mu binyamakuru vyigenga bankiwe gukurikirana ibirori vy’umunsi mukuru wo kwibuka aho abarundi bemeza ubumwe bw’abarundi, mu kigo kijejwe gukurikirana ibinyamakuru CNC bamenyesha ko uwatunganije ibirori afise uburenganzira bwo guhitamwo abamenyeshamakuru yipfuza ko bokurikirana ibirori.

Gabriel Bihumugani icegera c’umuyobozi wa CNC amenyesha ko mu gihe abateguye ibirori baba bateguye igitigiri c’abamenyeshamakuru,biragoye kurenza ico gitigiri kuko badaheza ngo baronka aho baja.

Kubwa Gabriel Bihumugani igikuru n’uko inkuru ivugwa,nayo mu gihe umumenyeshamakuru ataronse akaryo ko gushika ahabereye ibirori,arashobora gusaba ijambo ryashikirijwe umumenyeshamakuru yashoboye kuhashika.

Gabriel Bihumugani aremeza ariko ko umumenyeshamakuru afise uburenganzira bwo kuronka inkuru no gushikira uwumuha inkuru.

Mwomenya ko ku munsi wa mbere igenekerezo rya 6 Ruhuhuma umwaka wa 2017,igihe Uburundi bwahimbaza imyaka 26 iheze habaye amasezerano y’Ubumwe bw’abarundi,abamenyeshamakuru b’ikinyamakuru Iwacu bankiwe gushika ahabera ibirori,mu kibanza cubatswemwo icibutso c’ubumwe bw’abarundi.