Hashizweho umurwi wiga ibijanye no kwimurira ibiro vy’inama nkenguzamateka i Gitega

Nk’uko biri muri urwo rwandiko rw’umukuru w’inama nkenguzamateka y’Uburundi Reverien NDIKURIYO, uwo murwi urongowe na Renovat NIYONZIMA, icegera ciwe akaba Fabiola NKUNDIZANYE, umunyamabanga ni umupfasoni Mise NKESHIMANA.

Abandi bagize uwo murwi ni Lea NGABIRE,Ildephonse BARANDAGIYE, Melance SINDAYIGAYA, hamwe na Pascal NITUNGA.

Uwo murwi uzoba ujejwe kurondera inzu mu gisagara ca Gitega, ishobora kwakira ibisata vyose vy’inama nshingamateka, kuganira ku giciro co gupanga iyo nzu, kwiga ibikoresho bikenewe kugira inama nkenguzamateka ikorere mu ntara ya Gitega.

Nk’uko biri muri urwo rwandiko, uwo murwi ujejwe kandi kuraba mu bikoresho bisanzwe bihari ivyojanwa gukoreshwa i Gitega, hamwe no kwiga amafaranga akenewe mu kwimurira no gutunganya ahakorera inama nshingamateka i Gitega.

Umukuru w’inama nkenguzamateka amenyesha ko uwo murwi ufise amezi atatu yo gukora, kandi ko n’ibikoresho bikenewe kugira uwo murwi woroherwe mu gikorwa bihari.

Naho inama nkenguzamateka ariyo ibaye iya mbere itanguza ibikorwa vyo kwimurira ibiro vyayo mu ntara ya Gitega, mu migambi ya Reta y’Uburundi, n’inama nkenguzamateka ishobora kuja gukorera mu ntara ya Gitega.