Ibimenyeshamakuru bitarashira umukono ku masezerano na CNC vyagabishijwe

Mu kiganiro yahaye abamenyeshamakuru kuri uwu wa gatatu, Aimé Divine NIYOKWIZIGIRWA, icegera akaba n’umuvugizi w’urwego CNC yibukije ko ishirwako ry’umukono ku masezerano hagati y’ibimenyeshamakuru na CNC ari ntirengangizwa ku bakorera mu Burundi. Abataremeza ayo masezerano bamenyeshejwe ko bashobora gufatwa nk’abakora batubahiriza amategeko abagenga.

"Ibimenyeshamakuru vyigenga n’ibitigenga bitarashirako umukono kuri ayo masezerano, birasabwe kubikora imbere y’igenekerezo rya 31 Mukakaro 2017.", uko niko umuvugizi wa CNC yashikirije, akagabisha ko abazobirengako bazohanwa hisunzwe amategeko ari mw’itegeko rigenga ibimenyeshamakuru mu Burundi.

Aimé Divine NIYOKWIZIGIRWA, icegera akaba n’umuvugizi w’urwego CNC

Amasezerano hagati y’ibimenyeshamakuru na CNC asaba abakora umwuga w’ukumenyesha amakuru mu Burundi, gushikiriza urwo rwego ibikorwa vyabo, hamwe n’integuro y’ivyo barangura.