Inama nshingamateka yasabwe kwemeza ko inzara ari ikiza mu Burundi

Gabriel RUFYIRI, umukuru w’ishirahamwe OLUCOME yasavye inama nshingamateka y’Uburundi ko yokwemeza ko inzara hamwe n’ingwara ya marariya vyabaye ikiza mu Burundi.

Mw’ikete yandikiye umukuru w’inama nshingamateka y’Uburundi, Gabriel RUFYIRI yashikirije ko ibimenyetso bitari bike vyerekana ko inzara ari ikiza mu Burundi, n’abafasha Uburundi babwirwe ko igihugu gikeneye imfashanyo zihutirwa. Gabriel Rufyiri aranegura ko abarongoye Uburundi batemeza ku mugaragaro ko abanyagihugu bishwe na kigoyi, agashima ariko ingingo ziriko zirafatwa na Reta y’Uburundi mu ntumbero y’ukurwanya iyo nzara. Aho twobibutsa ko Reta y’Uburundi iheruka gukura amakori ku bifungurwa vya nkenerwa biva hanze y’Uburundi, ivyatumye ibiciro vy’umuceri n’ibiharage bigabanuka.

Umukuru w’igihugu c’Uburundi Petero NKURUNZIZA aheruka kumenyesha ko mu bijanye n’inzara, mu Burundi bikigendeka kuko gushika ubu ata murundi n’umwe aricwa n’inzara, agereranije n’ibihugu bimwe bimwe vyo muri Afrika bisinzikaye. Yabwiye Abarundi ko bari bakwiye gushima imana gusumba.