Iradiyo Bonesha FM igiye kwemererwa gusubira gukora

Icegera c’umukuru w’urwego rukurikirana ingene ibimenyeshamakuru bikora mu Burundi CNC, Gabriel BIHUMUGANI, amenyesha ko iradiyo Bonesha FM igiye gusubira gukorera ku mugaragaro mu minsi ya vuba.

Mu kiganiro yahaye abamenyeshamakuru kuri uno wa mbere igenekerezo rya 13 Ruhuhuma, umwaka wa 2017, Gabriel BIHUMUGANI yavuze ko urwego CNC rukorana neza na Radiyo Bonesha FM kandi ata kibazo kihari.

Muri ico kiganiro, Gabriel BIHUMUGANI yavuze ko iradiyo Bonesha FM yari kuba yaratanguye gukorera ku mugaragaro, kuko n’ubu abamenyeshamakuru bayo bakorera ku buhinga ngurukana bumenyi kandi bisunga amategeko agenga kumenyesha amakuru.

Gabriel BIHUMUGANI amenyesha ko atacobuza ko Iradiyo Bonesha FM ikora kuko isanzwe ifise n’umurongo ivugirako.

Mwomenya ko icegera c’umukuru w’urwego CNC ivyo yabishikirije mu gihe kuri uno wa mbere amakungu yahimbaza umunsi mpuzamakungu wahariwe amaradiyo.