ONU isaba abegwa n’ikibazo c’Uburundi gushira imbere inyungu z’igihugu

Ishirahamwe mpuzamakungu ONU risaba Reta y’Uburundi hamwe n’abatavuga rumwe nayo kwitaba ibiganiro bihuza abarundi, mu ntumbero yo gutorera umuti ibibazo vya politike vyibonekeza mu gihugu kuva mu mwaka wa 2015.

Mu cegereranyo umunyamabanga mukuru w’ishirahamwe mpuzamakungu ONU , yashikirije inama ya ONU ijejwe amahoro n’umutekano, Antonio Guterres asaba abegwa bose n’ikibazo c’Uburundi gushira imbere inyungu z’igihugu.

Umunyamabanga mukuru wa ONU asaba kandi ko abegwa n’ikibazo boreka gushira imbere inyungu zabo, bakitaba ibiganiro bihagarikiwe n’akarere ka Afrika y’Ubuseruko batarinze gusaba amananiza.

Antonio Guterres yavuze kandi ko ishirahamwe mpuzamakungu ONU rizobandanya gushigikira ico cose gifise intumbero y gutorera umuti ikibazo ca politike kiri mu Burundi biciye mu nzira y’amahoro.