PARCEM ibona ko Reta itorihisha amatagisi ibifungurwa biva hanze mu kurwanya inzara

Mu gihe haheze iminsi havugwa inzara mu bice bitandukanye vy’igihugu,Faustin NDIKUMANA arongoye ishirahamwe ryishinze gukangurira abarundi guhindura ingendo PARCEM amenyesha ko mu ntumbero yo kurwanya inzara,Reta yategerezwa guhagarika kurihisha amatagisi ku bifungurwa biva hanze y’igihugu.

Mu kiganiro yahaye abamenyeshamakuru kuri uno wa kabiri igenekerezo rya 31 Nzero umwaka wa 2017,Faustin NDIKUMANA amenyesha ko Reta idakwiye kuguma ivuga ihindagurika ry’ikirere gusa ,kuko ari kimwe mu bituma haba inzara.

Faustin NDIKUMANA amenyesha ko no mu bihugu vya Buraya canke muri Amerika yo mu Bumanuko,haba imyuzurira n’ibihuhusi ariko hatigera havugwa inzara,nkuko biri mu Burundi.

Muri ico kiganiro,umukuru w’ishirahamwe PARCEM amenyesha ko igisata c’uburimyi n’ubworozi ari ngira kamaro mu gihugu,ariko ivyo bisata bihabwa amafaranga make ugereranije n’aamafaranga ahabwa ibisata vy’ingenzi,ubutare n’amasoko ntanganguvu.

Umukuru w’ishirahamwe PARCEM akabona ko Reta yoreka gutoza amakori ku bifungurwa biva hanze kugira bigurwe ku giciro gito,hagashingwa kandi ikigo kijejwe kwiga icokorwa mu mwanya muto,igihe ikibazo c’inzara cibonekeje.