PARCEM isaba abanyeporitike gufasha gutorera umuti ikibazo c’ubukene kiri mu gihugu

Ivyo yabishikirije n’umukuru w’ishirahamwe PARCEM ,Faustin NDIKUMANA mu kiganiro yahaye abamenyeshamakuru kuruno wa gatatu igenekerezo rya 17 Gitugutu 2018 ku musi mpuzamakungu wahariwe kugwanya ubukene kw’isi.

Murico kiganiro,Faustin NDIKUMANA yavuze ko uyo musi wahariwe kugwanya ubukene kw’isi ushitse igihugu c’Uburundi kiza ubwa nyuma ku bukene mu bihugu 188 vyakoreweko ivyigwa.

Faustin NDIKUMANA avuga ko ubukene mu gihugu bungana hafi 70 kw’ijana,inzara ishika k’urugero rwa 40 kw’ijana mu gihe abana bafungura nabi baharurwa ku bice 58 kw’ijana.

Uyo mukuru wa PARCEM avuga ko kandi ibindi vyerekana ubwo bukene mu gihugu aruko ata bintu bishorerwa hanze y’igihugu,ibura ry’amafaranga y’agaciro hamwe n’ibura ry’ibikoresho mu gisata c’indero.

Faustin NDIKUMANA asaba abanyeporitike kwama bashiraho imigambi ibushitse kugira bafashe igihugu kuva mu bukene.