Udutabu tw’ukubikuza amafaranga (chéquiers) twa magendu twafashwe

Utwo dutabu twa magendu twafashwe mu gatondo ko kuri uwu wa gatatu, nk’igihe c’isaha cumi na zibiri z’agatondo, muri zone ya Rohero, kw’ibarabara bita "Ku Nkiko".

Mu giporisi bavuga ko utwo dutabu twatowe aho duteretswe, ariko uwatuhashize akaba atamenyekanye.

Nk’uko mu giporisi babandanya babimenyesha, udutabu (chéquiers) twafashwe ni 148 twa ECOBANK, 7 twa CRDB, 31 twa BGF, 155 twa BANCOBU, 181 twa BCB hamwe na 16 twa KCB.

Utwo dutabu dufashwe inyuma y’aho ibanki y’ubudandaji BCB (Banque Commerciale de Burundi) iherutse gufatira ingingo ko ata muntu n’umwe azosubira kuronswa amafaranga akoresheje "Chèque" yahawe n’uwundi muntu. Abarekuriwe kubikuza amafaranga akaba ari bene ububiko gusa (Titulaire), iyo ngingo ikazohinduka igihe kitamenyeshejwe, ariko kizoshikirizwa n’iyo banki nyene.

Nk’uko tubikura mu rwandiko rwasohowe na Reverien NTIBARAKE ajejwe kumenyesha amakuru mw’ibanki BCB, iyo ngingo yafashwe bitewe n’ubusuma (Braquage) bwakozwe ku modoka yariko yunguruza ama "Chequiers" ya BCB n’ay’izindi banki.