Umugambwe CNDD-FDD uriyamiriza icegeranyo ca Human Right Watch

Umugambwe CNDD-FDD umenyesha ko utemera ibiri mu cegeranyo c’ishirahamwe ryishinze gukingira agateka ka zina muntu Human Rigth Watch,aho ryagiriza urwaruka rw’imbonerakure rw’umugambwe uri ku butegetsi ko rukora ibikorwa vyo gusinzikaza agateka ka zina muntu mu Burundi.

Nancy Ninette MUTONI avugira umugambwe CNDD-FDD amenyesha ko ibiri mu cegeranyo c’ishirahamwe HUman Right Watch ari uburyo bwo kudendereza urwo rwaruka,nkuko bamye babikora mu guha ishusho itariyo urwo rwaruka.

Umuvugizi w’umugambwe CNDD-FDD amenyesha ko urwaruka rw’imbonerakure rukorana neza n’abandi nkuko bikorwa n’abandi banyagihugu mu gutsimbataza amahoro n’umutekano,kandi ko rwihaye intumbero yo guteza imbere igihugu.

Nancy Ninette MUTONI avuga ko urwaruka rw’imbonerakure ruri mu makomite y’umutekano ,mu ntumbero yo gukorana neza n’abajejwe intwaro,abajejwe umutekano hamwe n’abajejwe ubutungane.