Umushikiranganji w’uburimyi n’ubworozi amenyesha ko umwimbu uzoba mwiza ku mpeshi

Ubushikiranganji bw’uburimyi n’ubworozi mu Burundi bumenyesha ko bugiye gutanga imbuto z’ibiterwa bitandukanye mu ntara zine zibonekejemwo inzara.

Mu kiganiro umushikiranganji w’uburimyi n’ubworozi Deo Guide RUREMA yahaye abamenyeshamakuru yavuze ko abarundi bohumura kuko umwimbu uzoba mwiza mu gihe c’impeshi.

Muri ico kiganiro, umushikiranganji Deo Guide RUREMA yavuze ko mu ntumbero yo kurwanya inzara, icihutirwa kiriko kirakorwa ari ugukingira isi ndimwa, biciye mu guca imikobeko no gutera ivyatsi birwanya inkukura.

Umushikiranganji w’uburimyi n’ubworozi yamenyesheje ko mu gihe c’agatasi umwimbu muke n’inzara vyibonekeje mu ntara zine kuri 18 zigize igihugu c’Uburundi.

Ubushikiranganji bw’uburimyi n’ubworozi bumenyesha ko buriko burungika abahinga kwiga mu bihugu vyo hanze ukuntu bokorera ku butaka bw’Uburundi imbuto zirobanuye zizwi nka hybrides mu gifaransa.

Umushikiranganji Deo Guide RUREMA yabwiye abamenyeshamakuru ko gukoresha imbutoi zirobanuye bizotuma umwimbu w’ibiterwa bimwe bimwe wiyongera hafi incuro zine.