Abagize urugamba rwo kurwanya ikiringo ca gatatu baratabaza igisata ca ONU kijejwe umutekano

Mu mashirahamwe adaharanira ivyicaro vya poritike ahurikiye mu rugamba rwo guhagarika ikiringo ca gatatu c’umukuru w’igihugu, bandikiye intumwa z’ igisata ca ONU kijejwe umutekano kw’isi buca zigendera Uburundi kuri uno wa gatanu, kugira bafashe amaraso ntaseseke canke agateka ka zina muntu gahungabane mu Burundi.

Abaserukira amwe mu mashirahamwe ari mu rugamba rwo guhagarika ikiringo ca gatatu c’umukuru w’igihugu

Muri urwo rwandiko basaba igisata kijejwe umutekano guhanura umukuru w’igihugu Petero Nkurunziza kudahirahira kwitoza ubugira gatatu, kuko yoba ahonyanze amategeko, yaba ibwirizwa nshingiro canke amasezerano y’ i Arusha. Bavuga ko batabaje hakiri kare kuko hari abamaze kuvuga ko hamwe Petero Nkurunziza yoramuka avuze ko azokwitoza bazoca baja mw’ibarabara, mu gihe hari urundi ruhande narwo rw’ abari ku butegetsi bavuga ko nabo biteguye, ngo iyo hamaze kuba impari nkizo batabimenyesheje hakiri kare kugira bakinge mu Burundi hashobora kuba akarabaraye, nk’uko Petero Karaveri Mbonimpa arongoye APRODH abishikiriza. Muri ayo amashirahamwe, bavuga ko batifuza ko ivyabaye mu bindi bihugu nka Côte d’Ivoire , Burkina Faso bishikira igihugu, kandi imvo n’imvano bamaze kuyibona.

Bavuga ko iryo kete baryanditse bisunze kandi abamaze kuvuga bose biyamiriza ico kiringo ca gatatu c’umukuru w’igihugu, aha bakavuga inama nkenguzamateka yahagaritse isubirwamwo ry’ibwirizwa shingiro, aho hari intumbero yo gukuramwo ingingo zose zabuza umukuru w’igihugu Petero Nkurunziza ku kiringo ca gatatu, ivyashikirijwe n’abatavuga rumwe n’ubutegetsi, ko bazosidukira mw’ibarabara mu myiyerekano mu gihe umukuru w’igihugu yoshaka kwitoza ubwa gatatu, abasenyeri ba katolika b’ Uburundi basavye ko umukuru w’igihugu atokwitoza.

Ayo mashirahamwe avuga kandi ko yisunze ivyagiye bishikirizwa n’abasanzwe bafasha Uburundi nk’ishirahamwe ry’Ubumwe bwa Buraya, Reta zunzubumwe za Amerika, aho bose bagerageje kwerewkana ko ukwitoza kwa gatatu, kutoba gukurikije amategeko kandi ko hashobora kuba ingaruka mbi ku mahoro n’umutekano ku barundi no mu karere k’ Afrika y’Ubuseruko, icongeyeko kandi bavuga ko bisunze rwa rwandiko rw’ibiro vy’igendereza rwarungikiwe umukuru w’igihugu Petero Nkurunziza rumuhanura kudahirahira akitoza ubugira gatatu, kuko hashobora kuba ingaruka mbi. Ikindi ni uko n’ibihangange vyo mu mugambwe uri ku butegetsi vyagerageje kumuhanura vyose vyirukanywe ,ivyo vyose bikaba vyerekana neza ko umukuru w’igihugu Petero Nkurunziza ashaka kwitoza vyanka bikunda.

Muri ari ayo mashirahamwe ahurikiye mu rugamba rwishinze kwiyamiriza ikiringo ca gatatu c’umukuru w’igihugu, batabaza urwo rwego mpuzmaakungu kuba hafi y’ Uburundi kugira ntihagire ingorane ziba , bakaba baciye bandikira abo bose bakurikirana Uburundi.