Inama y’abakuru b’ibihugu biri muri CIRGL yungururijwe isango

Inama igira gatandatu y’abakuru b’ibihugu n’ama Reta biri mw’ishirahamwe ry’akarere k’ibiyaga binini (Conférence internationale sur la région des Grands lacs) yari itegekanijwe kuba kuri uwu wa gatanu igenekerezo rya 12 Ruhuhuma 2016, ntiyabaye, impamvu akaba ari kubera igitigiri c’abategerezwa kuyitaba kitakwiye. Iyo nama yaciye yungururizwa ku kwezi kwa Ntwarante.

Muri iyo nama y’abakuru b’ibihugu yari kubera i Luanda mu gihugu ca Angola itumweko ku butumire bwa José Eduardo Dos Santos, umukuru w’ico gihugu, akaba ari nawe arongoye ishirahamwe ry’akarere k’ibiyaga binini (Conférence internationale sur la région des Grands lacs), bari kwigira hamwe umutekano mu bihugu biwukenye n’Uburundi budasigaye inyuma, hamwe n’ingene amasezerano yateweko umukono yokwihutirwa gushirwa mu ngiro.

Bari kurabira hamwe kandi ibijanye n’usubirizwa ry’umunyamabanga nshingwabikorwa w’ishirahamwe ry’akarere k’ibiyaga binini (Conférence internationale sur la région des Grands lacs), mu gihe uwahora muri ico kibanza aheruka gusozera ikiringo ciwe.

Uburundi bwari bwaserukiwe na Gaston SINDIMWO, icegera ca mbere c’umukuru w’igihugu.