Abarundi basabwa guterera mu gukinga izimangana ry’igisagara ca Alep

Inyuma y’iminsi itari mike hari intambara mu gihugu ca Syria, umukuru wa sant ‘Egidio kw’isi Andrea Riccardi ahamagarira isi yose gutera umukono ku rwandiko ruri ku murongo w’ubuhinga ngurukana bumenyi, kugira igisagara ca Alep gitabarwe.

Mu muryango Sant’Egidio mu Burundi basaba ko n’abarundi batosigara inyuma mu gutera umukono kuri urwo rwandiko, nk’uko bishikirizwa na Jean Claude Nsabimana ajejwe gutanga amakuru muri Sant’Egidio mu Burundi, mu kiganiro yahaye ikinyamakuru IGIHE. Avuga ko imyaka ibiri iheze igisagara ca Alep gisanzwe kibamwo abantu benshi mu gihugu ca Syria atagahengwe, intambara ari urutavanako, abanyagihugu nabo bo mu madini yose batagira ic’epfo na ruguru.

Umuryango wa Sant’Egidio mu Burundi, ukaba usaba uwubishoboye wese yaba umurundi canke umunyamahanga aba ngaha mu Burundi, kwifatikanya n’abandi bantu baba mu mice itandukanye y’isi, mu gutanga ubutumwa bwabo, ku murongo dusanga kuri http://www.santegidio.org/pageID/3/langID/fr/itemID/9357/Sauvons_Alep___vous_aussi_signez_lappel.html, mu gusaba ko abanyagihugu ba Alep bogarukirwa kandi bagakira intekera zama ku mutwe, ndetse n’igisagara ca Alep kiriko kirazimangana, kigakingirwa, na rirya Alep kigira gatatu kw’isi kirimwo abakirisu benshi havuye i Kayiro na Beyrouth.

Jean Claude Nsabimana ajejwe kumenyesha amakuru muri Sant'Egidio mu Burundi