Abaserukira Reta babandanya guhumuriza n’aho abahunga babandanya kugenda

Abashikiranganji ba Reta y’Uburundi babandanya guhumuriza abanyagihugu basigaye ku mitumba batarahunga, mu kwishikira mu ntara zitandukanye.

Muri ico gikorwa co guhumuriza, umushikiranganji w’amagara y’abantu Sabine

Ntakarutimana yari mu ntara ya Ngozi, Godelieve Nininahazwe arongoye ubushikiranganji bwo gushigikirana nawe yari mu ntara ya Cibitoke, uwu mutekano nawe yari guhumuriza mu ntara ya Kayanza, mu gihe umushikiranganji w’inkino n’imico kama yagiye mu ntara ya Cankuzo.

Ubutumwa bw’abo bashikiranganji nka bose bukaba bwari bumwe. Guhumuriza abanyagihugu, kugira ntibabandanye guhunga, mu gihe amajambo bumva abaca ivutu ari ibihuha, bikunda kwibonekeza mu bihe vy’amatora. Abo bashikiranganji bakaba bibutsa abanyagihugu bimwe mu bihe vy’ibihuha vyagiye vy’ibonekeza mu matora canke inyuma yayo. Aha baravuga nk’udushinge, ba rukoti, Kiliba Ondes n’ibindi. Abavuga nabo ko hari ibirwanisho vyahawe Imbonerakure mu gutegura intambara, abashikiranganji bariko bahumuriza hagati mu gihugu, bavyamirira kure, bakavuga ko ari imvugo z’abanyeporitike bashaka kwonona amatora.

Sabina Ntakarutimana, umushikiranganji w'amagara y'abantu,

Nko mu ntara ya Ngozi ahari Sabina Ntakarutimana, umushikiranganji w’amagara y’abantu, akaba yabariwe ko muri komine ya Tangara, abanyagihugu baguma bihungira, abo nabo, bakaja mu Rwanda. Eka si aho gusa, no mu zindi ntara z’Uburaruko, abahunga, bikavugwa ko bagenda ku munsi , ku munsi. Benshi muri abo bahunga, bakavuga ko batinya ko ikiringo ca gatatu ca Petero Nkurunziza gishobora gutera intambara, co kimwe n’iterabwoba bavuga ko bakorerwa n’Imbonerakure zihurikiye mu mugambwe CNDD FDD.