Fostino Ndikumana: Amategeko agenga abamenyeshamakuru yokosorwa

Amashirahamwe ataho yegamiye mu vya politike yarungikiye urwandiko inama nkenguzamateka.

Mu gihe aho bukera inama nkenguzamateka izokwihweza integuro y’itegeko rizogenga umwuga w’ukumenyesha amakuru mu Burundi, amashirahamwe ataho yegamiye muvya politike mu gisata c’intwaro ibereye, yarungikiye urwandiko inama nkenguzamateka kuri uyu wa 17 Ndamukiza 2013, kugira basabe ntibemeze iryo tegeko rikirimwo utunenge.

Kubwa Fostino Ndikumana asanzwe arongoye ishirahamwe PARCEM, mu kiganiro yahaye abanyamakuru kuri uyu wa 18 Ndamukiza, yamenyesheje ko hamwe iryo tegeko ryoja mu ngiro, igiturire be n’ukudahana ivyaha bizoca vyaka indaro mu gihugu. Ati ba kaboko ntibatazosubira kumenyekana, eka n’amabi akorerwa abantu ntazosubira azoba umurengera.

Abandanya asigura ko hamwe iryo tegeko ryo mu mwaka w’2013 ryotorwa vyomutangaza cane kuko ryateye impari kuruta iryo bipfuza gusubiriza ryo mu mwaka w’2003.

Tubibutse ko amashirahamwe yateye umukono kuri urwo rwandiko ari 15.