Bernard Busokoza yatanguye amabanga y’icegera ca mbere c’umukuru w’igihugu

Bernard Busokoza yagenywe kugira asubirire Terensiyo Sinunguruza mu mabanga y’icegera ca mbere c’umukuru w’igihugu c’Uburundi, yarahiye icese imbere y’umukuru w’igihugu n’abashingamateka. Bernard Busokoza yatanguye icese amabanga y’icegera ca mbere c’umukuru w’igihugu, inyuma y’ibisikanya hagati yiwe na Terensiyo Sinunguruza ryabereye ku biro vy’icegera ca mbere c’umukuru w’igihugu.

Bernard Busokoza ariko ararahira imbere y’umukuru w’igihugu, abashingamateka n’abakenguzamateka hamwe n’abagize sentare yubahiriza ibwirizwa shingiro

Inyuma y’aho abadasigana ba UPRONA basabiye ko Terensiyo Sinunguruza yohindurwa mu kibanza c’icegera ca mbere c’umukuru, uwatanzwe kandi akemezwa n’abashingamateka n’abakenguzamateka, yatanguye icese amabanga y’icegera ca mbere c’umukuru w’igihugu, kuri uyu wa kabiri igenekerezo rya 22 Gitugutu uyu mwaka. Abashingamateka, abakenguzamateka, abaserukira ibihugu vyabo mu Burundi, abashikiranganji, abacamanza ba sentare yubahiriza ibwirizwa shingiro n’abandi bategetsi batandukanye ba Leta, bahuriye ku ngoro y’amakoraniro mu Kigobe, mu birori vyo gukurikirana aho Bernard Busokoza arahira icese, ibirori vyari bihagarariwe n’umukuru w’igihugu Petero Nkurunziza.

Abashingamateka n’abakenduzamateka bari mu ngoro y’amakoraniro mu Kigobe

Mu ndahiro yashikirije icese afashe ibendera ry’igihugu c’Uburundi n’iry’ubumwe bw’abarundi, Bernard Busokoza yemeye imbere y’umukuru w’igihugu ko azokwubahiriza ubumwe bw’abarundi n’ibwirizwa shingiro, ko azoshira imbere inyungu z’igihugu, amahoro n’ubutungane kandi ko azorwanya ikumira yongere yubahirize ukwikukira kw’igihugu c’Uburundi.

Mu biro vy’icegera ca mbere c’umukuru w’igihugu niho haciye habandaniriza ibisikanya hagati ya Bernard Busokoza na Terensiyo Sinunguruza. Mu bikorwa uwahora ari icegera ca mbere c’umukuru w’igihugu asigiye uwumusubiriye, Bernard Busokoza amenyesha ko ibigiye kwihutirwa ari ugukurikirana ibikorwa vy’isubirwamwo ry’ibwirizwa shingiro, integuro y’itegeko rizogenga amatora ririndiriwe n’abatari bake, n’umwenda w’amafaranga y’amarundi imiliyaridi zitanu Leta ifitiye ibitaro vy’abasirikare vyo mu Kamenge. Mu gihe uwo mwenda ushobora gutuma ivyo bitaro vyugara canke bibura uko bihemba abakozi. Icegera ca mbere c’umukuru w’igihugu Bernard Busokoza yamenyesheje ko bazovugana n’abandi vyega, barabe ukwo ico kibazo cotorerwa inyishu.

Mwomenya ko bitegekanijwe ko ku munsi w’ejo, igenekerezo rya 23 Gitugutu, ariho Terensiyo Sinunguruza azomenyesha sentare ntahinyuzwa amatungo afise ubu avuye mu mabanga y’icegera ca mbere c’umukuru w’igihugu.

Bernard Busokoza n’umutambukanyi wiwe

Abashingamateka n’abakenduzamateka bari mu ngoro y’amakoraniro mu Kigobe