Accueil > Amakuru > u Burundi > Ica kabiri c’imfashanyo amakungu yemeye kiramaze gushika mu gihugu
Ica kabiri c’imfashanyo amakungu yemeye kiramaze gushika mu gihugu
mardi 7 Rusama 2013
Inyuma y’inama yahuje abafasha Uburundi i Génève mu mugambi wo gufasha kurwanya ubukene CSLP ya kabiri mu mpera z’ukwezi kwa Gitugutu mu mwaka w’2012, amafaranga angana umuriyaridi umwe w’ama dolari y’Amerika uramaze gutangwa mu gihe hari hemewe gutangwa imiriyaridi 2 n’imiriyoni 600 z’amadolari ya Amerika.
Ivyo vyamenyeshejwe na Pamfiro Muderega, umunyamabanga mpuzabikorwa mu gisata kijejwe gutorokanya imfashanyo zinjira mu Burundi.
Yongera kandi akamenyesha ko hari inama zibiri zateguwe kugira baze bigire hamwe ico ayo mafaranga yokora mu kiganiro yahaye abanditsi n’abanyamakuru.
Izo nama zibiri zateguwe mu kwezi kwa Ruheshi ku magenekerezo ya 24 na 25 n’amagenekerezo ya 28,29 na 30 Gitugutu mu mwaka w’2013.
Hari ibikorwa bizogenda birirwa mu nama imwimwe yose, nko mu nama ya mbere hazokwiga ibikorwa bine navyo ni nko mu gisata co gutwara ibintu n’abantu, gutumanako amakuru n’ubushakashatsi, gufasha ibisata vyigenga, ubuzi hamwe n’ubudandaji, hazokwirwa kandi n’ingene igisata c’amagara y’abantu n’indero vyofashwa hamwe n’igisata c’amatongo, amazi n’ibidukikije.
Mu nama igira kabiri naho bazokwigira hamwe ibijanye intwaro ibereye, umutekano, agateka ka zina muntu, iterambere rusangi, ubutare, umuyagankuba, n’ibindi…
Twobamenyesha ko iyo migambi yose izoshirwa mu ngiro ihagarikiwe n’intumwa y’abadufasha iri kumwe n’intumwa ya Leta y’Uburundi.
Aristide Nizigire
