Canada isaba ibiganiro hagati ya Reta n’imirwi ya politike hamwe n’amashirahamwe yigenga

Umushikiranganji w’imigenderanire ya Canada n’ayandi makungu Stephane Dion ari kumwe n’umushikiranganji ajejwe iterambere mpuzamakungu n’ibihugu bivuga ururimi rw’igifaransa Marie-Claude Bibeau bamenyesha ko igihugu ca Canada gihagaritswe umutima n’amabi abandanya kurwira mu Burundi.

Mw’itangazo basohoye kuri uno w’Imana igenekerezo rya 13 Kigarama 2015,abo bashikiranganjo ba Canada bamenyesha ko barajwe ishinga n’igitigiri c’abahitanwa n’ibitero,bakicwa mu buryo n’ubu butaramenyekana.

Muri iryo tangazo igihugu ca Canada gisaba Reta y’Uburundi kuja mu biganiro n’imirwi ya politike n’amashirahamwe adaharanira ivyicaro vya politike. Canada isaba kandi ishirahamwe ry’Ubumwe bwa Afrika,akarere ka Afrika y’Ubuseruko gufasha mu kworosha ibiganiro mu maguru masha.

Igihugu ca Canada gisaba Reta y’Uburundi kwubahiriza agateka k’abarundi,kikamenyesha kandi ko kizobandanya gusaba ko ingingo zizana amahoro zifatwa kugira ngo amabi ntabandanye kwiyongera mu gihugu kimwe mu bikenye kw’isi.

Muri iryo tangazo nyene,igihugu ca Canada gisaba abanyagihugu baco bari mu Burundi kuvayo bigishoboka,mu gihe babona ko vyoba mu mutekano,gisaba kandi abohitamwo kuguma mu Burundi kwiyandikisha mu gisata kijejwe kwandika abanyagihugu ba Canada baba mu bindi bihugu.