ishirahamwe MAC risaba abarundi kuguma bafatanye mu nda

Ishirahamwe MAC(Ministere Africain pour la Compassion) rimenyesha ko ubwicanyi atari yo nzira izotorera inyishu ibibazo vya politike biri mu Burundi.

Mw’itangazo ryashikirijwe n’icegera c’umukuru w’ishirahamwe MAC Pintha Hayimana,iryo shirahamwe rihamagarira abakozi b’Imana kwigisha abayoboke babo kwama bubahana hagati yabo no kutaja mu bikorwa vyo kwihorahorana.

Muri iryo tangazo,ishirahamwe MAC rimenyesha ko igihugu c’Uburundi ari igihugu cacu twese kandi ko abarundi bategerezwa kwubahana,mu bice vyose bavamwo.

Ishirahamwe MAC rimenyesha ko ubudasa n’ubutandukane bwacu haba mu vyiyumviro canke mu bwoko,ari ubutunzi bw’igihugu bufasha guteza imbere igihugu mu bisata bitandukanaye.

Ishirahamwe MAC rirangiza rishimira abarundi ko batahuye ko atawushobora kubacanishamwo,rigasaba kandi abarundi bose kuguma bafatanye mu nda.