Ubumwe bwa Buraya bwatanze infashanyo yo gufasha impunzi z’abarundi

Ishirahamwe ry’Ubumwe bwa Buraya ryatanze amafaranga angana n’umuriyoni umwe n’igice w’amafaranga y’abanyaburaya azofasha mu kugarukira no gukingira impunzi z’abarundi bari mu bihugu bihana imbibe n’Uburundi.

Nk’uko vyamenyeshejwe mw’itangazo ryagiye ahabona kuri uno wa kabiri igenekerezo rya 5 Rusama, ayo mafaranga yatanzwe kuko igitigiri c’abahunga Uburundi ciyongereye cane mu ndwi ziheze, ayo mafaranga kandi akaba ari mu miriyoni 47 z’amafaranga y’abanyaburaya, yagenewe akarere k’ibiyaga binini muri uno mwaka w’2015.

Muri iryo tangazo Christos Stylianides komiseri mw’ishirahamwe ry’Ubumwe bwa Buraya ajejwe kwitaho abari mu ngorane no kurinda impanuka, avuga ko kubona hari abahunga mu karere amahoro ataratsimbatara, ari ibintu bibabaje cane ku kiremwamuntu, kandi kikaba ikibazo ku bihugu bibanyi bidafise ubushobozi bukwiye bwo kwakira impunzi.

Iryo tangazo rivuga ko Urwanda,Republika iharanira Intwaro rusangi ya Kongo hamwe na Tanzaniya bugarijwe n’ikibazo c’impunzi nyinshi zivuga ko zihunga iterabwoba,gufatwa nabi hamwe no guhohoterwa.

Gushika ubu iryo tangazo rivuga ko abantu barenga ibihumbi 30, ahanini bagizwe n’abagore n’abana bamaze guhunga, hakaba hari ubwoba ko ico gitigiri gishobora kwiyongera, kuko gushika kw’igenekerezo rya 3 Rusama Urwanda rwari rumaze kwakira impunzi zirenga 24 700.

Ishirahamwe ry’Ubumwe bwa Buraya rikamenyesha ko rikurikiranira hafi ibiriko biraba,rigashira ahabona kandi amakenga ku gitigiri c’impunzi kibandanya kwiyongera.