Ku wa mbere intonde z’abiyandikishije ziratangura kumanikwa

Guhera kuri uno wa mbere, igenekerezo rya 16 Ntwarante gushika kuwa 20 uku kwezi, niho hategekanijwe imanikwa ry’intonde z’abiyandikishije, nk’uko bishikirizwa na Petero karaveri Ndayicariye umukuru w’umurwi CENI.

Umurwi ujejwe gutunganya amatora CENI(Commission Eléctorale Nationale Indépendante) watangaje ikindi kirangaminsi gishasha co kumanika intonde z’abiyandishije hamwe no gusubira guha akaryo abatari biyandikishije mw’iyandikwa rya mbere kugira baheze babikore.

Izo ntonde rero zizoba zimanitswe mu bibanza vyabereyemwo iyandikwa rya mbere kuma ‘’centres d’inscriptions’’, nk’uko Petero Karaveri Ndayicariye , aho naho akavuga ko bazohasanga abakozi babiri b’umurwi CENI baje gufasha muri ico gikorwa. Intonde zikazoba zimanitse guhera isaha imwe n’igice z’agatondo gushika isaha cumi n’imwe n’igice z’umurango, guhera kw’igenekerezo rya 16 Ntwarante uno mwaka.

Guhera naho kw’igenekerezo rya 21 niho hazotangura igikorwa co guha akaryo abatiyandikishije mw’iyandikwa rya mbere, nabo bashobore kuronka uburenganzira bwo gutora. Ico gikorwa kikaba gitegekanywa ko kizomara iminsi itatu nk’uko Petero Karaveri Ndayicariye abandanya abimenyesha.

Ikindi mu murwi CENI bamenyesha, ni uko ibipapuro vyakoreshejwe mw’iyandikwa rya mbere arivyo nyene bizosubira gukoreshwa nka karangamuntu ,urupapuro rw’inzira Passeport n’ibindi vyose vyari vyemewe mw’iyandikwa rya mbere. Mu murwi CENI bakaba bahamagarira abo bose batari biyandikishije kurondera ivyangombwa vyose, ako karyo ntikaze kabacike.