ONU yatanze imiriyoni 15 z’amadorare yo gufasha impunzi z’abarundi

Icegera c’umunyamabanga mukuru wa ONU ajejwe kugarukira imbabare Stephen O’Brien yatanze imiriyoni 15 z’amadorare yo gufasha impunzi z’abarundi bahungiye mu gihugu c’Urwanda na Tanzaniya, mu mugambi w’Ikigega kijejwe gufasha mu bihe vy’ihutirwa.

Mw’itangazo ry’ishirahamwe mpuzamakungu ONU ryo kuwa mbere igenekerezo rya 1 Ruheshi,ishirahamwe mpuzamakungu ONU rimenyesha ko abarundi barenga ibihumbi 70 bagizwe ahanini n’abana bahunze igihugu c’Uburundi inyuma y’umutekano muke wibonekeje mu gisagara ca Bujumbura kuva mu mpera z’ukwezi kwa kane.

Muri iryo tangazo O’ Brien yamenyeshejeko ayo mafaranga azokoreshwa mu gufasha impunzi hamwe n’ibihugu vyabakiriye mu bijanye n’uburaro,gufungura,kwivuza hamwe n’ibindi vyo gukingira izo mpunzi vyihutirwa.Yipfuza ko ico gikorwa cofasha kwereka abandi babishoboye ko nabo bogira ico baterereye.

O’Brien yavuze ko amashirahamwe afasha ari mu gihugu ca Tanzaniya yamaze kugabisha ko ubuzima impunzi zibayemwo bugoye cane,kandi vyatumye haba ingora zifatiye ku magara y’abantu,mbere harimwo ikiza ca Cholera kimaze guhitana abantu bashika 30 harimwo impunzi n’abanyagihugu ba Tanzaniya nyene.

Iryo tangazo rimenyeshako mu gihugu c’Urwanda abafasha barajwe ishinga n’ibijanye n’infungurwa z’impunzi no gukingira abana,kuko abarenga 60 kw’ijana muri izo mpunzi ari abana.

Stephen O’Brien,icegera c’umunyamabanga mukuru wa ONU ajejwe gutabara imbabare yavuze ko ,imiriyoni 7,5 z’amadorare azotangwa mu bafasha mu gihugu ca Tanzaniya mu kwakira impunzi nshasha no kuzivana aho zishikira bazijana mw’ikambi y’impunzi y’i Nyarugusu,mu gihe ayababa imiriyoni 8 z’amadorare azofasha mu gihugu c’Urwanda,mu bijanye no gufasha vyihutirwa mu bibanza bibiri bishikiramwo impunzi hamwe no mw’ikambi y’impunzi iri i Mahama.

Mwomenya ko igihugu ca Republika iharanira Demokrasi ya Kongo naco kimaze kwakira impunzi z’abarundi kuva hatanguye imyiyerekano yiyamiriza ikiringo ca gatatu c’umukuru w’igihugu Petero Nkurunziza,mu gisagara ca Bujumbura.
.