Rwanda: Impunzi z’abarundi zigendana umugera wa SIDA zisaba gufashwa

Impunzi z’Abarundi ziba mw’ikambi ya Mahama zigendana umugera wa SIDA, ziratabaza kubera uko babayeho kandi badafashwa muvyo bakenera.

Izo mpunzi zivuga ko zitewe umwitwaririko no kuba bamaze kumara igihe cababa ukwezi badafata imiti igabanya ubukazi bw’umugera wa SIDA, mbere n’infungurwa bahabwa zikaba zidahuye n’ubuzima bwabo.

Bamwe mubaganairiye n’ikinyamakuru IGIHE bavuze ko basabwe kwiyandikisha bakerekana ubwoko bw’imiti bari basanzwe bafata ngo bafashwe kuyironka, ariko haheze ukwezi ata nyishu bararonka.

Bavuze ko abakozi b’ishirahamwe mpuzamakungu ryitaho impunzi UNHCR ryabasavye kwiyandikisha,baca biyandikisha barenga 80,ariko igitigiri kiguma kiduga kuko hari abandi baguma baja mw’ikambi y’impunzi.

Bose bamenyesha ko atari kubaha imiti gusa,kuva bashika mw’ikambi y’impunzi ata gipimo na kimwe baragirirwa kugira bamenye uko imibiri yabo yifashe.Bamenyesha ko bafise ubwoba kuko bishobora kugabanya amahirwe yo kubandanya ubuzima.

Marleen Masclee, umuyobozi mukuru ajejwe imigambi muri ARC mu Rwanda, yamenyesheje ko kugeza ubu hacubakwa aho gupimira no gutangira inyigisho ku bijanye na SIDA.

Yavuze ko hari ibiganiro bariko bagirana n’impande zitandukanye kugirango imiti igabanya ubukazi bw’umugera wa SIDA iboneke.Yavuze ko ku bijanye n’imiti , hari ibiganiro hagati y’Ubushikiranganji bw’amagara y’abantu, UNHCR na Global Fund kugirango iyo miti iboneke hanyuma itangwe ku buntu ku mpunzi ziyikeneye.

Marleen Masclee yamenyesheje ko ivyo biganiro biri hafi kurangira ku buryo mu minsi iza impunzi ziyikeneye zizoyisanga ku mavuriro y’ubushikiranganji bw’amagara y’abantu yegereye ikambi.