The Elders risaba iyubahirizwa ry’amasezerano y’i Arusha mu Burundi

Ishirahamwe ry’abahumure bahoze barongoye ibihugu bitandukanye, harimwo na Kofi Annan yahoze arongoye ishirahamwe mpuzamakungu ONU basaba abategetsi b’Uburundi kwubaha amasezerano y’i Arusha, ku nyungu z’igihugu.

Nk’uko bivugwa na Kofi Annan ari nawe arongoye iryo shirahamwe The Elders, amasezerano y’i Arusha, niyo yatumye hahagara intambara zari zimaze igihe z’igisibije mu myaka iheze mu Burundi, aho abanyagihugu bagera ku bihumbi majana atatu aribo bahasize ubuziama bwabo. Amatora y’umukuru w’igihugu rero ategekanijwe mu kwezi kwa Ruheshi uwu mwaka, akaba asa n’ayateye umutima uhagaze abatari bake mu Burundi,n’amakungu mu gihe ayo masezerano atokwubahirizwa co kimwe n’ibiringo vy’umukuru w’igihugu biyavugwamwo.

Iryo shirahamwe ry’abahoze ari abakuru b’ibihugu ryatangujwe na Nelson Mandela yahoze arongoye igihugu ca Afrika y’Epfo, mbere akaba ari nawe yari arongoye ayo masezerano yo guhagarika intambara mu Burundi, rimenyesha ko ari nkenerwa ko abanyeporitike b’abarundi bamenyera kwubahiriza amasezerano, aha bakavuga nk’iyubahirizwa kandi ry’amasezerano y’urupapuro rw’inzira yateweko umukono n’abanyeporitike bose mu mwaka w’2013. Iryo shirahamwe rero, risaba kandiabanyeporitike, kutaza barahenda urwaruka, baruhamagarira gushamirana n’urundi.

Mwomenya ko iryo shirahamwe The Elders ririmwo abantu batandukanye bigeze kurangura amabanga ahambaye kw’isi, aha tukavuga nka Koffi Annan yahoze arongoye ishirahamwe mpuzamakungu ONU, Martti Ahtisaari yahoze arongoye Finlande, Fernando Henrique Cardoso yahoze arongoye Bresil, Jimmy Carter yahoze arongoye Reta zunzubumwe z’Amerika, Musenyeri Desmond Tutu arongoye umurwi w’ukumenya ukuru n’ukunywanisha muri Afrika y’Epfo, Graca Machelle umuhinga yigenga w’ishirahamwe mpuzamakungu ONU ku birwanisho bihabwa abana, n’abandi.