UE iriteguye guterera uburyo bwo gufasha gutunganya ibiganiro mu Burundi

Ishirahamwe ry’Ubumwe bwa Buraya rimenyesha ko ryiteguye guterera uburyo bwofasha kugira ibiganiro bihuza abarundi vyobera i Kampala ku murwa mukuru w’Ubuganda bisubire kuba bihagarikiwe n’umukuru w’igihugu c’Ubuganda Yoweri Museveni.

Igihugu c’Ubuganda gisaba amafaranga yababa imiriyoni 2,5 z’amadorare y’abanyamerika kugira gitunganye ibiganiro vyobera ku murwa mukuru w’igihugu i Kampala.

Kuva habaye ibitero ku makambi atatu ya gisirikare kuwa gatanu igenekerezo rya 11 Kigarama 2015,ishirahamwe ry’Ubumwe bwa Buraya ryamenyesheje ko ryiteguye gutanga amafaranga yofasha mu gutunganya ibiganiro,ariko risaba ko ivyo biganiro vyohuza abarundi bose vy’ukuri.

Muri iyo ntumbero nyene,ishirahamwe ry’Ubumwe bwa Afrika risaba ko ibiganiro vyojamwo n’abatavuga rumwe na Reta bahungiye hanze y’igihugu bahurikiye mu runani CNARED,naho nyene Reta y’Uburundi idashaka kwumva urwo runani ruvugwa.

Ibibazo vya politike biri mu Burundi vyatanguye kwibonekeza mu mpera z’ukwezi kwa kane,kuva bimenyekanye ko umukuru w’igihugu Petero Nkurunziza azosubira kwitoza kurongora igihugu. Ivyegeranyo vy’amashirahamwe atandukanye bimenyesha ko abantu bababa 240 bamaze kwitaba Imana kuva hatanguye imyiyerekano yo kwiyamiriza ikiringo ca gatatu c’umukuru w’igihugu.