Komiseri ajejwe agateka ka zina muntu muri ONU yasabwe kwikosora mw’ijambo ’’milice’’

Amashirahamwe atatu ONELOP, Ligue Izere na ACOPA ariyamiriza ijambo akarwi k’inkorabara ryakoreshejwe na komiseri mukuru ajejwe agateka ka zina muntu , mbere bamusaba kwisubirako kuko ku bwabo yakoresheje imvugo yo gucanishamwo abarundi.

Francois Xavier, Kazihise Pierre Claver, hamwe na Becaud Njangwa baserukira ayo mashirahamwe

Inyuma yaho abarongoye urwaruka rw’imbonerakure biyamirije izina biswe na komiseri mukuru ajejwe agateka ka zina muntu Zeid Ra’ad Al Hussein ‘’milice’’, ubu naho n’amashirahamwe atatu ari muri bamwe bavuga ko badaharanira ivyicaro vya poritike Ligue Izere, ACOPA na ONELOP amenyesha ko yababajwe cane n’ivyashikirijwe n’umukomiseri mukuru wa ONU ajejwe agateka ka zina muntu , nk’uko babishikirije mu nama yo guhanahana ivyiyumviro mu ntumbero yo gutegura amatora atekanye arimwo bose.

François Xavier Ndaruzaniye ati, dusaba komiseri mukuru wa ONU ajejwe agateka ka zina muntu kwisubirako kuri iryo zina yahaye urwaruka rw’imbonerakure, ridakwiye na gato ati twarabonye muri kahise ivyo iyo mirwi yakora nko kwica , kwiba guturira , n’ibindi, bagatanga uturorero tw’aba sans echec,sans defaite, JEDEBU, Amasekanya n’abandi.

Ayo mashirahamwe asaba gukosora iyo mvugo yakoresheje icanishamwo abarundi ishobora guta mu kaga igihugu c’Uburundi, nk’uko Francois Xavier Ndaruzaniye abandanya abishikiriza. Ayo mashirahamwe amenyesha kandi ko yandikiye umunyamabanga mukuru ajejwe inama nkuru y’umutekano kw’isi bamumenyesha ko ijambo ryakoreshejwe n’umukomiseri ajejwe agateka ka zina muntu ari ribi cane, bamusaba n’uko yoribakurako, kuko yabaremetse inteba ishushe.