Accueil > Ukwemera > AMASHENGERO > Cibitoke : Amashengero menshi ntazwi n’amategeko
Cibitoke : Amashengero menshi ntazwi n’amategeko
mercredi 24 Mukakaro 2013
Mu ntara ya Cankuzo hibonekeza amashengero menshi ku buryo amwe muri iyo atazwi n’ubushikiranganji bw’intwaro yo hagati mu gihugu. Ivyo rero ugasanga ari vyo vyama bikwenga ukwutumvikana muri ayo mashengero, kuko usanga badashoboye kwumvikana ku boshobora kuzezwa amabanga akomakomeye mw’isengero.
Buramatari w’intara ya Cibitoke aremeza ivy’ayo mashengero, ko mu ntara arongoye hari amashengero menshi cane. Avuga ko mu nama bagize n’abarongoye abandi mu ntwaro mu kwezi kwa Ruhshi, bashoboye kumenya igitigiri c’amashengero 50. Igitangaje rero, ni ukwo igice kinini c’ayo mashengero kitazwi n’amategeko bagaca bifata nk’amashirahamwe ataho yigenga. Naho biri ukwo, ico gitigiri c’amashengero kiguma kiduga.
Buramatari Anselme Nsabimana avuga ko ukwutumvikana kenshi usanga gufatiye k’uworongora abandi, ingorane rero zica zihera aho kuko uca usanga abo barongoye abandi muri ayo mashengero baca bashira imbere inyungu zabo, mu gushaka kwigarurira ubutunzi. Mbere ukwemera kwa bamwe muri abo bashinga ayo madini aha na hariya atazwi n’amategeko, aho usanga ukwemera kwabo gufise ico kugamije.
Aratanga akarorero k’abantu barwara malariya, hageze aho boja kwa muganga bagaca bigumira muhira, canke bagatumako abaza kubasengera aho bari, bakareka gufata imiti izwi n’amategeko yo kwa muganga.
Buramatari abandanya avuga ko hari n’abandi baguma mu vyumba vy’amasengesho, aho bamara ijoro n’umurango atakindi bariko barafasha umurwayi atari ugusenga, bakareka kumujana kwa muganga. Muri komine ya Buganda rero, niho ibintu nk’ivyo bimaze kwibonekeza, aho ndetse abantu bahasize ubuzima banse kuja kwa muganga, mu gihe bafashe kuguma mu vyumba vy’amasengesho.
Aristide Nizigire